Prizren, 9 tetor 2026 – Instituti i Kosovës për Drejtësi (IKD) ka mbajtur sot ligjëratë dhe takim diskutues me studentët e Fakultetit Juridik të Universitetit “Ukshin Hoti” në Prizren, ku është prezantuar Nisma Legjislative Qytetare për ndryshimin dhe plotësimin e Kodit Penal të Republikës së Kosovës.
Ligjërata është mbajtur nga Ehat Miftaraj, Drejtor Ekzekutiv i IKD-së, dhe Naim Jakaj, Hulumtues i Lartë në IKD, të cilët kanë prezantuar procesin e nismës legjislative qytetare, rëndësinë e pjesëmarrjes së qytetarëve në procesin ligjvënës, si dhe dy ndryshimet që IKD synon t’i adresojë përmes kësaj nisme.
Në fokus të diskutimit ishin propozimet që moszbatimi i qëllimshëm i vendimeve të Gjykatës Kushtetuese të sanksionohet penalisht, si dhe që të sanksionohet penalisht përdorimi i parasë publike për përfitim elektoral gjatë periudhave zgjedhore dhe parazgjedhore.
Gjatë takimit, studentët patën mundësi të diskutojnë me përfaqësuesit e IKD-së rreth propozimeve, nevojës për ndryshimet e propozuara në Kodin Penal dhe rolit që qytetarët mund të kenë drejtpërdrejt në inicimin e ndryshimeve ligjore.
IKD do të vazhdojë prezantimin dhe diskutimin e Nismës Legjislative Qytetare me studentë dhe qytetarë, në kuadër të aktiviteteve për përmbylljen e procesit të nismës.