Prishtinë, 17 janar 2021 – Ekipi i monitoruesve dhe hulumtuesve të Institutit të Kosovës për Drejtësi (IKD) ka hulumtuar integritetin e kandidatëve të partive politike të përfshirë në listat zgjedhore për zgjedhjet e parakohshme, të cilat do të mbahen më 14 shkurt 2021.
Gjetjet e hulumtimit të IKD-së tregojnë se në listën zgjedhore të Nismës Socialdemokrate, nga 110 kandidatë për deputetë, rezulton se dy (2) prej tyre janë të dënuar aktgjykim të formës së prerë në tri (3) vitet e fundit derisa dy (2) kandidat janë me aktakuza aktive.
Duke qenë se IKD është e vetmja organizatë, e cila monitoron sistematikisht trajtimin e rasteve në sistemin e drejtësisë, në vazhdim pasqyron në mënyrë detajuar, të gjitha informacionet për këta kandidatë të Nismës Socialdemokrate.
| Kandidati për deputet | Data e ngritjes së aktakuzës | Vepra penale në aktakuzë | Faza procedurale | Lloji i aktgjykimit | Data e vendosjes | Vendim i plotfuqishëm |
| Endrit Shala | 30.11. 2017 | Përdorim i armës | Aktgjykim i formës së prerë | Dënues – 2400 euro gjobe | 30.07.2019 | PO |
| Endrit Shala | 10.02. 2020 | Lëndim i lehtë trupor | Ndërmjetësim | |||
| Aziz Thaqi | / | Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare | Aktgjykim i formës së prerë | Dënues – 6 muaj burgim me kusht dhe 600 euro gjobë | 18.09.2019 | PO |
| Besnik Berisha | 20.5.2016 | Zbulim i fshehtësisë zyrtare | Në proces |
Tabela 1: Kandidatët e Nismës Socialdemokrate për deputet me aktakuza si dhe dënime në tri (3) vitet e fundit.
IKD në listën zgjedhore të Nismës Socialdemokrate ka identifikuar edhe të paktën një (1) kandidatë për deputet, i cili është dënuar para më shumë se tre (3) viteve.
| Kandidati për deputet | Data e ngritjes së aktakuzës | Vepra penale në aktakuzë | Faza procedurale | Lloji i aktgjykimit | Data e vendosjes | Vendim i plotfuqishëm |
| Zafir Berisha | 27.03 2014 | Lidhje e paautorizuar në shërbime | Aktgjykim i formës së prerë | Dënues – 140 euro gjobë | 20.08. 2015 | PO |
Tabela 2: Kandidatët e Nismës Socialdemokrate me dënime më të vjetra se tri (3) vjet.
IKD vazhdimisht ka avokuar për dekriminalizimin e skenës politike, duke kërkuar nga partitë politike që të ngrisin integritetin e listave zgjedhore me kandidatë që nuk kanë probleme me ligjin.
IKD thekson se të dhënat janë mbledhur nga monitorimi sistematik i seancave gjyqësore publike. Pra, ka mundësi, sikurse ka ndodhur në praktikën gjyqësore, që të ketë aktakuza të ngritura ndaj politikanëve të caktuar, që mund të jenë në këto lista, por të cilat nuk janë bërë publike ende.
Gjithsesi, IKD do të hulumtojë edhe ditët në vazhdim, për të kompletuar secilin informacion mbi secilin kandidatë që gjendet në listat zgjedhore.
IKD do të publikojë të dhënat e te gjithë kandidatëve që janë në listat zgjedhore të të gjitha partive politike dhe koalicioneve, duke u bazuar në të dhënat e monitorimit nga sistemi i drejtësisë.