Pejë, 13 tetor 2026 – Instituti i Kosovës për Drejtësi (IKD) ka mbajtur sot ligjëratë dhe takim diskutues me studentët e Universitetit “Haxhi Zeka” në Pejë, në kuadër të prezantimit të Nismës Legjislative Qytetare për ndryshimin dhe plotësimin e Kodit Penal të Republikës së Kosovës.
Ligjërata u mbajt nga Qemajl Marmullakaj, Hulumtues i Lartë në IKD, i cili prezantoi të drejtën e qytetarëve për nismë legjislative, procesin përmes të cilit qytetarët mund të propozojnë ndryshime ligjore, si dhe përmbajtjen dhe arsyetimin e propozimeve të IKD-së.
Në fokus të diskutimit ishin dy propozimet e nismës: sanksionimi penal i moszbatimit të qëllimshëm të vendimeve të Gjykatës Kushtetuese dhe sanksionimi penal i përdorimit të parasë publike për përfitim elektoral gjatë periudhave zgjedhore dhe parazgjedhore.
Gjatë takimit, studentët patën mundësi të diskutojnë për ndryshimet e propozuara në Kodin Penal, arsyet që kanë çuar në ndërmarrjen e nismës dhe rëndësinë e pjesëmarrjes së qytetarëve në procesin ligjvënës.
Në përfundim të aktivitetit, studentëve iu ofrua mundësia që, në mënyrë vullnetare, ta mbështesin me nënshkrimin e tyre Nismën Legjislative Qytetare.
IKD falënderon Universitetin “Haxhi Zeka” në Pejë, stafin akademik dhe studentët për pritjen, bashkëpunimin dhe interesimin e treguar ndaj nismës.